69 வது இந்திய குடியரசு தின விழா.....

ஊத்தங்கரை ஒன்றியம், ஜோதிநகர் ஊராட்சி ஒன்றிய நடுநிலைப் பள்ளியில் இன்று (26.01.2018) 69வது இந்திய குடியரசு தினவிழா நடைபெற்றது.

முன்னதாக காலை சரியாக 9.00 மணிக்கு பள்ளியில் இந்திய தேசியக் கொடியை பள்ளித் தலைமை ஆசிரியர் திரு செ. இராஜேந்திரன் அவர்கள் ஏற்றி வைத்தார்.

பின்னர் நடைபெற்ற குடியரசு தின விழாவிற்கு பள்ளித் தலைமை ஆசிரியர் திரு செ. இராஜேந்திரன் அவர்கள் தலைமை தாங்கினார். பள்ளி உதவி ஆசிரியர் திருமதி மு. இலட்சுமி அவர்கள் அனைவரையும் வரவேற்றார்.

பள்ளி உதவி ஆசிரியர்கள், திருமதி நா. திலகா, பெற்றோர் ஆசிரியர் கழகத் தலைவர் திருமதி மோ. ஐஸ்வர்யா ஆகியோர் வாழ்த்துரை வழங்கினர்.

விழாவில் பள்ளித் தலைமை ஆசிரியர் திரு செ. இராஜேந்திரன் அவர்கள் தமது தலைமை உரையில் இந்திய குடியரசு தின விழாவின் சிறப்பு குறித்தும், இவ்விழா நடத்தப்படுவதன் காரணம் குறித்தும் விரிவாக விளக்கியதோடு நமது நாட்டின் விடுதலைக்கு பாடுபட்ட தலைவர்கள் பற்றியும் அவர்கள் நாட்டுக்குச் செய்த தியாகங்கள் குறித்தும் கூறி அதுபோல மாணவர்களும் சமுதாயத் தொண்டு ஆற்றவேண்டும் எனக் கேட்டுக்கொண்டார்.

மேலும் இந்திய சுதந்திரப் போராட்டத்தில் ஈடுபட்ட ஊத்தங்கரை வட்டம் மற்றும் கிருஷ்ணகிரி மாவட்டத்தைச் சேர்ந்த தியாகிகள் பற்றியும் எடுத்துக் கூறி அவர்கள் அனைவரையும் நினைவுபடுத்தினார்

பின்னர் மாணவர்கள் இந்தியக் குடியரசு தின விழா குறித்து உரையாடினர், மேலும் தேசபக்திப் பாடல்களைப் பாடினர், அடுத்து   தேசபக்திப் பாடல்கள் பாடும் போட்டி, பேச்சுப் போட்டி, கட்டுரைப் போட்டி   ஆகியவற்றில் வெற்றி பெற்ற பள்ளி மாணவர்களுக்கு பரிசுகள் வழங்கப்பட்டது.

இறுதியில் பள்ளி உதவி ஆசிரியர் திரு வே. வஜ்ஜிரவேல் அவர்கள் அனைவருக்கும் நன்றி கூறினார்.

விலையில்லா பாடநூல்கள் வழங்கும் விழா

இன்று 02.01.2018 – ஊத்தங்கரை ஒன்றியம் ஜோதிநகர் ஊராட்சி ஒன்றிய நடுநிலைப் பள்ளியில்  மூன்றாம் பருவ விலையில்லா பாடநூல்கள் வழங்கும் விழா  நடைபெற்றது.

     பள்ளித் தலைமை ஆசிரியர் திரு செ. இராஜேந்திரன் அவர்கள் தலைமையில் நடைபெற்ற விழாவில், முன்னதாக  பள்ளி உதவி ஆசிரியர் திருமதி மு. இலட்சுமி அனைவரையும் வரவேற்றார். பின்னர் பேசிய பள்ளித் தலைமை ஆசிரியர் தனது தலைமை உரையில் அரசால் வழங்கப்படும் விலையில்லா கல்விப் பொருட்களை சரியாகப் பயன்படுத்திக் கொண்டு, அனைத்து மாணவர்களும் சிறப்பாக கல்வி கற்க வேண்டும் என எடுத்துக் கூறினார். .

பின்னர் மாணவர்கள் அனைவருக்கும் மூன்றாம் பருவத்திற்கான விலையில்லா பாடநூல்கள், பாடக் குறிப்பேடுகள், இரண்டு இணை சீருடைகள்  பள்ளித் தலைமை ஆசிரியரால் வழங்கப்பட்டது.

விழாவிற்கான ஏற்பாடுகளை உதவி ஆசிரியர்கள், ந. திலகா, த.லதா, வே. வஜ்ஜிரவேல்  ஆகியோர் செய்திருந்தனர். 

பாரதியார் பிறந்தநாள் விழா....

இன்று 11.12.2017 திங்கட்கிழமை ஊத்தங்கரை ஒன்றியம் ஜோதிநகர் பள்ளியில் பள்ளி தமிழ் இலக்கிய மன்றம் சார்பில் பாரதியார் பிறந்தநாள்  விழா கொண்டாடப்பட்டது.

முன்னதாக காலையில் பள்ளி வளாகத்தில் அலங்கரித்து வைக்கப்பட்ட பாரதியாரின் படத்திற்கு பள்ளி மாணவர்கள் மற்றும் ஆசிரியர்களால் மரியாதை செலுத்தப்பட்டது.

பின்னர் பள்ளித் தலைமை ஆசிரியர் திரு செ. இராஜேந்திரன் அவர்கள் தலைமையில் நடைபெற்ற விழாவில், முன்னதாக உதவி ஆசிரியர் திருமதி மு. இலட்சுமி அனைவரையும் வரவேற்று இன்றைய விழாவின் அவசியம் பற்றி எடுத்துரைத்தார். பள்ளித் தலைமை ஆசிரியர் தமது தலைமை உரையில் இன்று அகில இந்தியா முழுமையும் உள்ள அனைத்து பள்ளி, கல்லூரிகளிலும்  பாரதியாரின் பிறந்த நாள் விழா கொண்டாடப்படுவது குறித்தும், அதற்கு காரணம் பாரதியாரின் தன்னலமற்ற பங்களிப்புதான் என்பது குறித்தும் விரிவாக பேசியதோடு, அவரின் தேசபக்தி, மக்களை விழிப்புணர்வூட்டும் பாடல்கள், பெண்கல்வி, பெண்ணுரிமை தொடர்பான கருத்துக்கள் ஆகியவை பற்றியும் விரிவாக விளக்கி, அனைவரும் பாரதியாரின் எண்ணங்களை செயல்படுத்திட முன்வர  வேண்டும் எனவும் கேட்டுக்கொண்டார்.

மேலும் இன்று சர்வதேச மலைகள் தினம் என்பதையும், சர்வதேச குழந்தைகள் நல நிதியம் துவக்கப்பட்ட நாள் என்பதையும் கூறி இன்று முன்னாள் குடியரசுத் தலைவர் பிரனாப் முகர்ஜி அவர்களின் பிறந்த நாள் என்பதையும் நினைவு கூர்ந்து குறிப்பிட்ட அந்த நாட்களின் சிறப்பு பற்றியும் எடுத்துக் கூறினார்.

பின்னர் மாணவர்கள் பாரதியார் பிறந்தநாள் தொடர்பான பேச்சு, கட்டுரை, கவிதை, பாடல் மற்றும் ஓவியப் போட்டிகளில் தமது திறமைகளை வெளிப்படுத்தினர்.

அதன் பின்னர் வட்டார, மாவட்ட அளவில் நடைபெற்ற பல்வேறு போட்டிகளில் சிறப்பிடம் பெற்ற மாணவர்களுக்கு பரிசுகள் மற்றும் சான்றிதழ்கள் வழங்கப்பட்டது. விழாவில் உதவி ஆசிரியர்கள், திருமதி த. இலதா, திருமதி ந. திலகா ஆகியோர் வாழ்த்துரை வழங்கினர்.

இறுதியில் பள்ளி உதவி ஆசிரியர் திரு வே. வஜ்ஜிரவேல் அனைவருக்கும் நன்றி கூறினார்.