விலையில்லா பாடநூல்கள் வழங்கல்

ஊத்தங்கரை ஒன்றியம் ஜோதிநகர் ஊராட்சி ஒன்றிய நடுநிலைப் பள்ளியில் மாணவர்களுக்கான விலையில்லாப் பொருட்கள் இன்று வழங்கப்பட்டது.

இன்று (30.09.2013) முதல் பருவத் தேர்வு விடுமுறை முடிந்து மாணவர்கள் பள்ளிக்கு வந்தனர். மாணவர்களின் கல்வித் தரத்தை மேம்படுத்தும் பொருட்டு தமிழக அரசால் பள்ளி மாணவர்களுக்கு 14 வகையான விலையில்லாப் பொருட்கள் வழங்கப்பட்டு வருகிறது அதன்படி இன்று ஊத்தங்கரை ஒன்றியம் ஜோதிநகர் ஊராட்சி ஒன்றிய நடுநிலைப் பள்ளியில் மாணவர்களுக்கான இரண்டாம் பருவ பாடநூல்கள், பாடக் குறிப்பேடுகள் மற்றும் மூன்றாவது சீருடை ஆகியன வழங்கப்பட்டது.  

முன்னதாக பள்ளித் தலைமை ஆசிரியர் திரு. செ இராஜேந்திரன் அவர்கள் தமிழக அரசால் வழங்கப்படும் விலையில்லா கல்விப் பொருட்கள் பற்றியும், அவற்றை எவ்வாறு பாதுகாக்க வேண்டும் என்றும் கூறி இப் பொருட்களைப் பயன்படுத்தி தமது கல்வியை தொடந்து மேம்படுத்திக்கொள்ள வேண்டும் எனக் கூறி அனைவருக்கும் விலையிலா பாடநூல்கள், பாடக்குறிப்பேடுகள், சீருடைகள் ஆகியவற்றை வழங்கினார். உடன் உதை ஆசிரியர்கள் திரு. ப. சரவணன், திருமதி சு. சாரதா. திரு. வே. வஜ்ஜிரவேல், திருமதி அ. நர்மதா ஆகியோர் இருந்தனர்.    

புத்தாக்க அறிவியல் ஆய்வு விருதுக் கண்காட்சி

கிருஷ்ணகிரி மாவட்ட அளவிலான  புத்தாக்க அறிவியல் ஆய்வு விருதுக் கண்காட்சி கடந்த 26.06.2013 அன்று கிருஷ்ணகிரி புனித அன்னாள் மகளிர் மேல்நிலைப் பள்ளியில் நடைபெற்றது. கிருஷ்ணகிரி வருவாய் மாவட்டத்தைச் சேர்ந்த 201 நடுநிலைப் பள்ளிகள் இக் கண்காட்சியில் கலந்துக்கொண்டன.

     முன்னதாக நடைபெற்ற துவக்க விழாவில் மாவட்ட ஆட்சியர் திரு டி.பி. இராஜேஷ் அவர்கள் கலந்துக்கொண்டு கண்காட்சியைத் துவக்கி வைத்தார். அவ்விழாவில் மாவட்ட முதன்மைக் கல்வி அலுவலர் திரு மு. இராமசாமி, அனைவருக்கும் கல்வித் திட்ட முதன்மைக் கல்வி அலுவலர் திரு பொன்.குமார், மாவட்டத் துவக்கக் கல்வி அலுவலர் திரு டி. துரைசாமி, மாவட்டக் கல்வி அலுவலர் திரு க. அன்பு, மாவட்ட ஆசிரியர் கல்வி மற்றும் ஆராய்ச்சி நிறுவன முதல்வர் திரு இரா. நடராஜன்,  மாவட்ட சுற்றுச் சூழல் மன்ற ஒருங்கிணைப்பாளர் திரு. மோ. மகேந்திரன் மற்றும் உதவித்தொடக்கக் கல்வி அலுவலர்கள் பள்ளித் தலைமை ஆசிரியர்கள், ஆசிரியர்கள் உள்ளிட்ட ஏராளமானோர் பங்கேற்றனர்.

     கண்காட்சியில் மாவட்டத்தின் 10 ஒன்றியங்களில் இருந்து வந்திருந்த மாணவர்கள் தமது புத்தாக்க படைப்புகளை ஒன்றிய வாரியாக வைத்திருந்தனர். அவை பார்வையாளர்களை பெரிதும் கவர்ந்தது. கண்காட்சியில் வைத்திருந்த பெரும்பாலான படைப்புகள் சூரிய ஒளி மூலம் மின்சாரத்தை தயாரித்து பயன்படுத்தும் படைப்புகளாகவே அமைந்திருந்தது தற்போதைய எதார்த்த சூழலை வெளிப்படுத்தியதோடு அதற்கான தீர்வை சொல்லக் கூடியதாகவும் அமைந்திருந்தது அனைத்து படைப்புகளும் செயல்முறைப் படைப்பாகவே (WORKING MODELS) அமைந்திருந்ததால் அவற்றை சம்மந்தப்பட்ட மாணவர்கள் செயல்விளக்கம் செய்துக்காட்டினர். காலை முதல் மாலை வரையில் நடைபெற்ற இக்கண்காட்சியை அருகில் உள்ள பல பள்ளிகளைச் சேர்ந்த மாணவர்களும் கண்டுகளித்தனர்.

     மாலையில் நடைபெற்ற நிறைவு விழாவில் தேர்வுக் குழுவால் சிறந்த படைப்புகளாகத் தேர்வு செய்யப்பட்ட 17 பள்ளிகளைச் சேர்ந்த மாணவர்களுக்கு பரிசுகளும் சான்றிதழ்களும் வழங்கப்பட்டன.